Angelo Carboni

Chirriolos

Passan, che in una 'ijone,

sos impedrados carrarzados,

bicocas derrutas,

funtanas issaeschidas,

sicas che corru,

barandiglias faladas de ruinzu,

tzimbranas ismentigadas

e picapedreris a ischina unchinada.

Cascias e antigos cantaranos

pudrigados sun de pupuine.

Benujos iscorzolados in caltzones

curtzos e tapulados, e coros biaitos,

totu acuvados dae catramu e cementu.

Ferrajolas e frailarzos

chi giaitan sos ammentos

e isprenden bijones

de oes iscanesos.

Una 'oghe ispannat sa garrera:

" Chì si leat su ramin'etzu (1)

pro su nou! "

Su pessamentu, s'anima iscodulan

in sos nodos de Santu 'Ainzu.

In sa Pischina 'e Sa Rughe,

de nou luada a friscu,

letolos e manteddos

de piantigosas criaduras,

'ennidas una fatu s'atera,

lana de tramatas e cabidales

abbentan in su solianu,

apicados in sa cresura.

Sa trinca, a mata groga a chelu,

a cascos est isalenende.

Sos pitzinnos e piseddas,

cuntentos che grodde in cabidanni,

chena pispinzos, 'oddin mura...

Abburrigono, a manos paradas,

in s'aficu de piscare zente,

passizende, che unu tempus,

in Su Pepianu,

pro m'ammoddigare sos oriolos.

Una pibera' e abba

addentigat isperas noales.

Pitzinnìa e isetos bolados,

imbranconadu in un'istoja,

tinnìa e ispiga murina

m'intran in costazos,

ed'eo m'ingaleno,

in tribides rujas,

bisende carignos de lentore.

1) Cando fimus minores, in s'atunzu, benian a bidda sos ramanajos e pro fagher acudire sa zente, abboigaian de custa manera.

Chì, dae su castiglianu aquì, inoghe. Faeddu in suspu impreadu dae sos ramanajos de Isili, chi impitaian sa limba "arromanisca", de origine rom-albanese, oramai faeddada dae pagos, pro no si fagher cumprender dae sos comporadores, e los poder coglionare mesu mesu.

Isetos

In una ertiga, apicados,

sos aficos mios penden

dae petzos intitieddados,

che iscalas de ua apicadorza

e giobos de saltitza,

afumende a s'arrastu

de istrodda 'e niberu

e tupas de calacasu.

Rajos gerriles de sole

a sa muda colan e carpin

sos bidros de sa 'entana

de s'aposentu meu,

dae annos, istripide

de afannos e penas

familiares, de atere e mias.

Torrat bida a s'astraore

de custa carena frita

e s'imberghet su sentidu

in consolos mai cubidos.

In custa sicagna de sentidos,

apitu isto a tramuzones

e isusciadas de lughe.

Istripide, letu antigu de linna, suta s'istoja o tramata b'aiat una taula; tramuzone, bulione de 'entu; isusciada, birridu de abba.

Notes de ispera (1)

In pes de letu, chena pasu,

sa frullana ischimat

pesseris aurtidos e bisos

de disizos bajanos e ancujados.

In buca frita 'e furru

sentidos bajulan sos trastis

de podda luego sueta

in notes de suore e beddìa,

sonnos pasidos, istruminzos

de arrajolidu bisonzu.

Isterridas in sa mesiglia,

che landarigos de fremmentarzu,

apitu sun a manos ammadrigadoras.

Rughes e istragos falados de pupuine

in campusantos antigos e abbandonados,

afungan in ludraos mentales chi,

su camu ponen a disizu e voluntade.

Trigu carpidu a sas intragnas

de malepurtzedidas terras,

boltadu chin sale e abba 'e funtana

in misturu aturradu, cochitas,

cotzilas d'elda e fumuderra.

Sighide, da ue sezis, a cumassare,

tender, ifurrare, illadiare,

lutias de suore sagradu,

chin contos de fele, mele

e iscacaglios de risu,

pro sos anghelos de su chelu

e coros poveros e bramidos.

A tia Binedda, Battistina, Gàlmina e a mamma chi, pius de chimbant'annos a como, a trumbulu de iscùru, si nde pesaian pro cogher su misturu e ateros panes, chi 'endian. Recuian a puddiles a domo, francu de istìu, pro nd'ischidare sos fizos, balu minores, e los aprontare pro andare a iscòla.