Gianni Delogu

Attinaduras de amore

Dulzesa chi m'assupris'a sa mente

chi mi dasa trambùliu donzi die

mi faghes tribulare malamente

finas si la leo rie rie,

Mi ninnas che unu bisu delicadu

pessende 'a s'ermo sura'e s'istimada

e m'indischidas totu fustigadu

iscutinende s'anima accamada.

Ma s'omine chi est ja accolzoladu

no b'ada bentu chi li mintet pore

su coro est bene arraighinadu

pro podere afrontare 'onzi rigore.

Isperas ch mi enides'a m'animare

e chi mi dades tanta diciosia

andade pasidas e serenas

a discansare sas carignas mias.

E no mi fato pessamentos meda

so siguru chi tue gighes 'a mie

in pettus in su coro 'e in sa mente

dulche'e isplendente chei sa seda.

Mi lasso ammasetare sos pispinzos

oghendeche troboju dae'intro'e a mie

e torro a m'abacare chin calcura

ponzende paghe'a sa matana mia. 

A su Dutturadu

Como chi ses suprida/u a Dutturadu

pustis de meda isperas e disizos

pro giomper' a s'intentu tou bisadu

ti siat su caminu cobeltu 'e lizos

diai creschende in annos e foltuna

fattasa semper unu seguru isettu

chena 'aere mai malapasca peruna

ma cun diciosa solte e fattu erettu

cun aria de serena magestade

e cun candela 'e oju soliana

faghedi onore 'e recreu in onestade

e mira sa vida cun anima galana.