Nanni Falconi

S'amore meu

Gasi benzeit s'amore meu a s'istoja,
essende dae su litu fungudu,
essende a sas miradas de su mundu.
Gasi la bideint iscabiddada in su pinnetu,
upa de lughe intrende in s'isperalla,
cantende in su nidu de su ciddi coa.
Gasi lu bideint in sa mirada chi sa muvra
daiat a su muvrone, de bàrdia,
a cara a bentu,
in s'oru de su calancone.
Fiat un'amore bennidu chena lentzolos
lassinende in sas isterrimentas allentoradas
e frorende in su calacasu de su sartu.Chie est chi at bidu s'amore meu
a su tempus de sas istojas?

Cando at a benner sìàteru istiu

Cando at a benner s'àteru Istiu

a sa bratzeta t'apo a leare pro dansare impare in sa corte

abbratzados che duas colovras allorigadas in su pruereddu.

Sos suspiros nostros e su suore s'ant a misciare apare suta su sole.

E cando nos amus a pasare dae sos basos,

basos tèbios de lavras chi atzuddant sa pedde,

basos de friscura de funtana, de creaduras in su lacu,

sètzidos in sa raighina in s'umbra de su Filighe Mascru

nos amus a bisare trusados,

currende a tota fua in sa falada de su tzirighinu de Lerno,

che piseddutzos riende a scacàllios, brinchende oru oru,

dae pedra in pedra in sos sperrumadorgios de Lotoa.

Tue ses sa chi m'amparat dae sos pisi-pisi de sos tzilleris,

dae sos bolos mios de Astore, dae sa soledade de pitzinnu

dae sas murras giogadas cun sos pòddighes fui-fui

in sa carrera a lughe de luna.

A denote tentaia in s'istula

A denote tentaia in s'istula

su madrigadu de babbu.

Mi corcaia a bentre a chelu

in una isterrimenta de calacasu,

e miraia ispantadu sos isteddos

in sa bia de sa paza.

Bisaia biagios intre galassias isconnotas,

ramuzaia amores de piseddina.

Mudigone e soledade a fitianu

istaiant cun megus a costagiu

cun s'apentu de su ferru de sa gama.

E gai fuia una reartade mischinedda.

Le poesie sono estratte dalla raccolta Su grodde bos at a contare de me pubblicato da edizioni NOR carrera Lombardia 11 nella collana di poesia is cruculeus