Peppino Fogarizzu

Innu e progressu

Sos chizos betzos de su sakem navajo,

sinnadu dae peleas meda,

sa betzita amerindia guatemaltecа,

su mindigu de Calcuta,

sos meninhos de rua in Sao Paolo,

chi no connoscheint mai bator muros de aju e caentu,

isperiant su chelu chin nues piopanas;

su calighe de sas semidas de s'irmentigu,

a còlumu pro ch'esser bufadu in una 'ia,

nde bogat a pizu chirriolos de soledade,

biculos de malinconia,

rilughes, interlughes de catarsi.

Eo no isco pius

si velezende in mares de atediu

apo a poder amare

sas dies piopanas de risos ecumenicos,

chena alenu malu,

istorchende mudas amiganscias.

Sa mariposa fibrillat,

fibrillat lebia.

Tue no ischis cantu 'alet sa luna.

Sa mariposa fibrillat,

fibrillat lebia.

Sas alas suas sunt de oro e de ramine.

Tue no ischis cantu 'alet sa luna.

Ma peri sas Ramblas

in mesuaonzi zenia de zente,

istas Malinoski poete carreraju,

bendende versos

e bisos baratos;

bogas isparghende in cussa falada

e sa poveresa 'e sos trastos

e sa richesa a mustra 'e s'amina.

Ahi! Ahi! Ahi!

Si totu sos troubadours de s'Otzitania,

sos musicantes de sa Catalunya,

sos cantadores de palcu de Sardigna

si dant aboju in sa piata manna de Arsolè,

s'at a pesare unu cantigu mannu

pienu de rosas de libertade,

arriu de notas de arrempellu

pro sos populos oprimidos,

pro sas limbas mutzadas.

Ahi! Ahi! Ahi!