Rino Cambiganu

Animu rebelle

In d'una istanziedda remonida

paret chi bi ballent sas fadas,

bi 'olant penseris a mancu 'e alas,

lezeros sunt,.. isperiant sa vida.

S'intras a cue, s'ojada poi falas

a un' ijone galana e fiorida,

leat su coro apena l'as bida

comente su chi tenes e amas.

Est una prenda chi 'ides e bramas

che poesia cando est finida,

tue non la tocas ..e chin ispantu miras.

Custa pintura leada dae chelu,

impare a sa cornice indeorada,

in cumpanzia l'amus apretziada

.. est s'animu rebelle de Anghelu.

Impoltu 'e leiscione a nois dada

de foltza 'e sa mente e mannu zelu,

nudda la cuat, ne caratza nen telu,

est sa foltza 'e ispiritu agatada.

Rebelle dae sa sorte triulada,

de sas peleas tue faghes sulenu

e das curagiu finas a chie non l' ada.

Totu nos gighes che turtures canas,

nos aproendas de sabia currente,

isfriscas intro 'e nois coro e mente,

non b'at logu pro malas intragnas.

Tue ses tue, finas si ses zente,

de cussu istadu chi pagu ti nde lagnas,

antzias lu boltas, che su 'entu in cannas

rendende su saludu indetziente.

Passas sa vida siat frita che caente,

la leas diai, chena pessare a lanas

e solu lughe bides como presente.

Meraviza 'e natura (a Patada)

Sa natura, deris mi so' postu a la mirare;

chena limite est sa lacana torrada,

no b'at menzus cosa 'e l'adorare

ispalghende s'ojada in monte e mare.

Como, si bi resesso, a passu 'e caminada

illustro tota canta, campagna e sa leada;

piantas, fiores e frutos chi sun de disizare,

totu mi dan gosu, piaghere a mie dada.

In mesu a nodischeddos e una pedra peltunta

ap' idu prunitzedda impare a pirastrola,

chilchende 'e la tocare apo leadu punta

pro tancare sos aidos chin sa folchidda ispunta.

Ateros arrasolos, tiria e ozastrola,

tupas de calacasu, chin abes 'ola-'ola;

cresura 'e maltigusa bi cheret a trapunta,

e calarighe e rhu chin mura a rosa sola.

Frunzas de usciareu intro de un'almutu

impito a fagher pinzos chin juncos e tinnia,

impare a s'uda 'ona e chin restuju asciutu

istojas e pischeddos, cubone chi nd'est rutu.

Sa chessa e su mudeju,chi sun sempre imbia,

sun foltes e presentes, chei sa tirulia,

faghen dignos frutos, bonos che late sutu,

inchendene sos furros, paga pretes' ebbia.

Ite bellas piantas olostiu e isparagina,

decoran su Nadale, li dant color' e sonu,

impare a s'isparau eo coglio usciadina

pro poder dare fogu poi a sa cotighina.

Chin fascias de iscobalzu e pro restare a tonu

fato iscobalzolas, letos duros che tronu.

Multa sempre presente niedda e bianchina,

impare a s'elidone dan frutu bellu e bonu.

M'ammento s'eliginzu impare a su saucu

m' ant fatu cumpanzia gioghende in pitzinnia,

laturighe chin ferula, in su furru s'imbucu

apo pulidu a isse, che nare chin su mucu.

No poto ilmentigare ozastros pro olia,

niberu antigu, mancu, pro arias chi mi dia,

mi devo iscabiddare, ca' est de assucu,

sa foltza 'e sa natura, no est chei si siat.

Sos alvures reales, como pro cumpletare:

elighe, suelzu e chelcu pius foltes che mai,

sos ch'apo ilmentigadu m'ant a peldonare

pro otavas uguales de iscriere e rimare.

De calchi cosa nada, foltzis no est totu gai

ca' già mi rendo contu, non so' "Luca babbai".

e suta e un'aliderru mi ponzo a reposare

e miro a bidda mia, pius bella che mai.